由游學修、許賢及蘇致豪創辦嘅 YouTube 頻道「試當真」,將於 10 月 26 日開台五周年當日正式停運,其斥資百萬製作嘅告別重頭作《墨魚遊戲 2》下集《墨魚遊戲 3》前晚首播,播出未夠一日點擊已破百萬,最高峰更有 17.5 萬人同步收看,以強勁口碑為五年征程畫上句點。
以韓劇《魷魚遊戲》為藍本嘅二次創作,匯聚 100 位網紅、歌手、演員及 DJ 參與,終局之戰續以「氹氹轉菊花園」「天下太平」「007 入子彈」等香港兒時遊戲展開淘汰,多個片段引發網民熱議。其中 13 歲參賽者 Jacky 喺「氹氹轉菊花園」中抽中「國王」兼落入危險區,嘉盈即時叮囑佢「唔需要保護我哋,應該由我哋保護你」,其後陳家樂、鄧月平等 7 人主動走入危險區陪伴,最終 8 人一同淘汰,網民留言謂「睇到喊哂,大家錫住小朋友好有愛」。
中場休息時,金馬影后鍾雪瑩以「叛變紅衣人」身份驚喜登場,率張文傑、Martin 王智騫及試當真 Stone 反抗黑衣人,犧牲前更搞笑自曝「來自蛇口」,網民驚嘆「試當真下重本,連影后都請到」。Stone 則憑超強包剪揼技巧圈粉,先於三人淘汰環節以「自爆出揼」戰術生還,後在「天下太平」中連環猜中對方出招,助隊伍全員晉級,被讚「處事成熟有膽識」。
決勝戰「007 入子彈」成為高潮,農夫成員陸永全程以「我係菊花王」「龜縮網」等金句帶動氣氛,「遊戲大王」洪天明則憑投入表現獲讚「無擺前輩架子」,二人雖早段出局,仍被網民封為「MVP」,直言「有佢哋先夠好睇」。
最終決戰上演 LollyTalk「內戰」,阿蛋對決隊友 Yanny,在擊敗 Yanny 後面臨「射 BB 或自殺」嘅人性考驗,佢選擇自殺後,主持人宣布槍中無子彈,阿蛋成功奪冠並獲 $100 獎金。對呢個結果,網民反應兩極,有人驚訝「最估唔到 last game 係佢贏」,亦有人認同「佢每個遊戲都搏盡,值得勝出」。節目尾段阿蛋突然暈倒,更埋下續篇伏線。