「貨車界女神」鄭希怡（Yumiko）向來係圈中出名嘅凍齡代表，44 歲依然 keep 住靚樣同好狀態，點知最近一條社交平台短片就嚇親唔少網民，仲引嚟「撞樣伍詠薇」嘅熱議添！
事緣 Yumiko 近日喺抖音上載自拍片段，片中佢一臉「老態」：眼皮明顯下垂，眼袋浮腫，最搶鏡嘅係深邃到見骨嘅法令紋，同平時精靈活潑嘅樣貌判若兩人。片段一出，網民即刻熱議：「點解 Yumiko 突然斷崖式衰老？」、「呢個樣子有啲似伍詠薇㖞！」，仲有人擔心佢係咪身體唔舒服。
Yumiko 抖音片段一出，網民即刻熱議：「點解 Yumiko 突然斷崖式衰老？」(圖: 網絡翻攝)
不過睇到片段後半段就會發現「真相」— 原來 Yumiko 玩緊變老濾鏡！鏡子反射出嘅真身依然靚麗凍齡，皮膚緊緻冇鬆弛，同濾鏡效果形成強烈對比。佢仲好大方喺評論區互動，笑住話就算 20 年後真係咁樣，都要做頂級美魔女，自信態度贏晒掌聲。
講到呢位前英皇小花，當年憑住一曲《相對濕度》唱到街知巷聞，仲因為歌曲深受物流界朋友喜愛，獲封「貨車界女神」，呢個稱號宜家提起都依然有畫面感。出道多年，Yumiko 事業有起有伏，曾經歷健康同意外挑戰，但都一一闖過，2014 年同化妝師老公梁學儲結婚，翌年誕下女兒「梁浸浸」，家庭幸福美滿。
2014 年同化妝師老公梁學儲結婚，翌年誕下女兒「梁浸浸」，家庭幸福美滿。(圖: 鄭希怡的新浪微博)
近年 Yumiko 長駐內地發展，2020 年舉家移居上海，住連花園獨立屋，事業亦迎來新高峰：參加真人騷《乘風破浪的姐姐》人氣急升，仲有份演出劇集《繁花》，演技備受肯定。不過原定今年 8 月喺廣州舉行嘅演唱會就突然宣布延期，距開 show 仲有一個月時，Yumiko 親自發文道歉：「已經到咗該成熟嘅年紀，但仲係咁不妥協、不將就，實在改唔到呢個該死嘅任性。我只希望呈現出來嘅，能夠不留遺憾，請原諒我呢個處女座」。後來主辦方補充，延期係因為大型舞美設備進場受限，無法趕及搭建。
Yumiko 近期正忙住為 TVB 合拍劇《風華背後》拍攝，同蔡少芬、朱茵、黄宗澤等實力派演員合作。(圖: 鄭希怡FB)
雖然演唱會要等多陣，但 Yumiko 嘅工作冇停低，近期正忙住為 TVB 合拍劇《風華背後》拍攝，同蔡少芬、朱茵、黄宗澤等實力派演員合作，陣容強大令人期待。從演唱會力求完美嘅堅持，到玩濾鏡嘅隨性，都見到 Yumiko 多年未變嘅真性情，難怪咁多年都仲有咁多粉絲支持！
