從「塑料姊妹花」到好閨密！張曦雯劉佩玥暢談《俠醫》拍攝 拒戀綜原因曝光

TVB 劇集《俠醫》 日前在鑽石山一商場舉行宣傳活動，劇中眾演員悉數出席，現場氣氛熱烈。其中，劇中飾演「塑料姊妹花」的劉佩玥及張曦雯，在接受媒體訪問時，戲外親密如好閨密，暢談了不少有趣話題。​

近期戀綜《女神配對計劃》熱度不斷，同為單身的劉佩玥及張曦雯被問及是否有意參加時，二人連忙「耍手擰頭」。性格外向的劉佩玥笑言怕自己的「兄弟格」嚇怕男士，「我驚我會喺節目度過份興奮、過份開心，我個人比較 E（外向）。我驚我會令到啲男仔覺得，點解你同個個都好 friend 咁樣，好容易 friend zone 咗啲男仔」。而張曦雯則表示自己性格內斂，無法在鏡頭前放開尋找對象，「如果我要喺個 camera 面前去搵一個 partner 的話，我覺得我未必可以放得開。我最唔想就係如果參加咗，係為咗節目效果去夾硬揀一個嘅話，咁就變咗好似對愛情呢樣嘢太兒戲，又對對方又唔公平」 。儘管劉佩玥不想參加，但她笑稱願意擔任「Ｘ光團」，在旁為他人參加戀綜把關，給予意見。

談到劇中角色，劉佩玥坦言飾演「黑化」的 Natalie 事前下了不少苦功，「個角色係難做嘅，因為本身張曦雯咁 sweet，同埋喺戲入面，Rachel 其實由頭到尾都對 Natalie 好真心、好好啦，完全係咩都會諗對方」。她解釋角色的陰暗面源於一種極度的不平衡，「佢個心入面就係覺得，點解你可以咁好過啊？點解你條路可以咁順？點解我要犧牲自己咁多嘢，先至換到一啲嘢？你咩都唔使，就可以吸晒啲嘢返嚟」 。張曦雯則表示飾演的 Rachel 單純善良，某程度上與自己相似，「其實啲人都會可能覺得我個角色好蠢，俾人呃完一次又一次」，但她認為做人有時「蠢蠢哋」反而更開心。​

活動現場，二人還大爆丁子朗的拍戲糗事。劉佩玥爆料：「丁丁佢有個花絮呢，佢本身好型咁走，然後佢一開車呢，佢係開咗個行李箱。」張曦雯也補充：「佢唔識揸車嘅丁丁，但佢有好多場戲都係好型咁揸住架開篷，但係其實又唔識拉手掣啊，咩都唔識。」有趣的是，二人在劇中都與丁子朗有親密戲份，且都賞了他耳光，不過二人都表示現實中捨不得打他。此外，張曦雯笑指丁子朗在劇中對她「下毒手」很變態，而劉佩玥則為丁子朗拍裸露戲的努力「平反」，稱他會為此不吃東西、做運動。為了讓觀眾一飽眼福，二人更定下收視福利：「收視過 25 點，丁丁除衫！」

值得一提的是，張曦雯分手後狀態大勇，迷上 Pilates 的她在社交平台分享短視頻，好身材引來逾萬網民點讚。她透露新劇《璀璨之城》已重新整理劇本，即將開拍。而在《俠醫》方面，劇集首播錄得 22.9 點，148 萬觀眾捧場，暫列今年兩線劇集首播冠軍。陳豪作為主演之一，謙稱不敢自認收視福將，「做係冇問題，Keep 係最難，有口碑、有收視已經交到功課」 。張曦雯更預告大結局是 Happy Ending，還表示現實中希望找到一個像劇中「凌醫師」般的另一半，「因為睇中醫唔使錢，仲有人可以幫我免費按摩」 。她更與陳豪打趣回應拍攝胸部針灸戲份的話題，笑言電視尺度有限，期待下次有機會呈現更多精彩。